Naustaborgir

Í dag var hlaup hinna skrefstuttu. 

Við mættum fjögur niður í Átak og öll í vestum nema Helga sem hafði fundið til fínt vesti merkt og allt, en hafði svo gleymt því.  Hún fékk lánað endurskinsband í afgreiðslunni.  Svo langaði mig til að sleppa við svifrykið og Helga vitnaði í einhvern hundaeiganda sem hafði sagt að stígarnir í Kjarna væru frábærir núna, frosin möl, alveg besta færi sem hugsast gæti.  Og við ákváðum þá eftir nokkuð japl jamm og fuður að fara upp í stóra fína bílinn hans Sigga og keyra upp á bílastæðið við Naustaborgir.  Lögðum öll af stað galvösk út í bíl og snerum öll við samtímis þegar við föttuðum öll að við vorum öll að gleyma græjunum okkar sem við höfðum skilið eftir úti til að þær töpuðu ekki tungli.  Helga kvartaði undan kuldanum í bílnum hans Sigga og Gunni kvartaði undan músagangi.  Ég hafði nú mestar áhyggjur af því að hann væri á nöglum en þagði um það. 

Við hlupum svo þarna af stað eftir stígnum í gegn um Naustaborgir, öll í takt og töluðum um það þegar við komum að ljósastaur sem var slökkt á að það væri kannski svolítið dimmt þarna.  En það var nú allt í lagi.  Svo mættum við hundi og manni og Helga sagði seinna að þetta væri maðurinn sem hefði sagt að stígarnir væru fínir.  Það var víst eins gott fyrir hann að við mættum honum í upphafi ferðar og ekki þegar við vorum að koma til baka.  Því þegar við komum þarna syðst í Kjarnaskóg þar sem hallar mikið undan fæti, þá var þar slík fljúgandi hálka að annað eins hefur sjaldan sést.  Og svo sást hún líka varla því það var jú svo dimmt!  Og ég persónulega kann betur við það að sjá til þegar ég dett.  Helga verður jú aldrei veik þannig að hún hætti ekki á neitt og ég hugsaði að það væri betra að hafa læknana fyrir aftan mig þegar ég dytti og beinbryti mig og flýtti mér að vera á undan Helgu og Sigga, en Gunni hvarf þarna einhversstaðar fyrir framan okkur.  Enda meiðir hann sig bara við það að beygja sig niður í pottaskáp og ekki við að detta niður úr stillans.  Svo kom Gunni allt í einu aftur og fór að tala um að það væri gott að hafa sálfræðing með í för, þannig að það hljómar pínu eins og hann hafi meira þjáðst af einhverri fælni en beinbrotum.  Myrkfælni? 

En það voru ein stór mistök þarna í þessu öllu hjá okkur.  Það var engin þörf fyrir vestin!   

Fríða

Vesti vesti vesti

Ef ykkur er voða illa við einhvern skulið þið hvetja viðkomandi til að hlaupa úti án þess að vera í vesti.  það lítur svona út.  

 

Kannski í lagi fyrir þá sem eru búnir að ganga frá erfðaskránni og alveg sama þótt við hin verðum voða leið.

 

Ég ætla að halda áfram að vera í vestinu mínu. 

 

 

Fríða 

Maraþon á Landsmóti UMFÍ

Nú hefur verið afráðið að í tengslum við Landsmót UMFÍ á Akureyri í júlí í sumar verði efnt til maraþonhlaups - þ.e. heilt maraþon, hálft maraþon, 10 km og væntanlega einnig enn styttra fjölskylduskokk. Margar skemmtilegar hugmyndir hafa verið ræddar um útfærslu á maraþonhlaupinu - ein þeirra gengur út á að maraþonhlauparnir leggi af stað 42 km frammi í firði og síðan hlaupi þeir eins og leið liggur í bæinn. Bændur og búalið í Eyjafjarðarsveit gæti þannig tekið að sér að brynna hlaupurunum með allskyns göróttum drykkjum og jafnframt að efna til hljómleika við hverja heimreið þannig að úr þessu gæti orðið helmikið festival. Meira um þetta síðar.

Nýr staður

Ég verð víst að gefa mig og samþykkja að Blogger sé ekki að öllu leiti góður staður fyrir bloggsíðu Eyrarskokks.  Þannig að nú ætlum við að gefa blog.is séns.